العيشه واللى عايشينها

الموت … آن آن آآآآآآآآآن !!
حد يقولي لونك حزايني ليه النهارده أقوله اهو تغيير واستني وكمل الموضوع يا معلم وبعدين احكم
الموت علميا ينقسم إلي قسمين :
القسم الأول : الموت اللي بجد وده برضه بينقسم إلي قسمين :
القسم الأول من القسم الأول : الموت اللي بجد بجد
القسم التاني من القسم الأول : الموت الإكلينيكي
والاتنين دول مالناش دعوه بيهم خالص
إنما اللي إحنا عايزين نتكلم عنه هو القسم التاني من القسم الأول من الكلام ( حد فاهم حاجه ؟؟؟؟؟؟ )
القسم التاني : الموت وإحنا أحياء
ايون …. مافيش أي غلط ف كلامي
للموت بالحياة أسباب كتيره جدا منها أسباب هامه ومنها أسباب عبيطه
من الأسباب إلهامه :
العيشة كلها اللي إحنا عايشينها دي يعني دخل منخفض جدا ومافيش أي ترفيه لان مافيش ضروريات أصلا.
تخيلوا معايا…. بحسبه بسيطة كده واحد أتعين من تلاتين سنه بمرتب 200 جنيه مثلا كان المرتب ده يجيب كام كيلو لحمه ؟ كانت اللحمة ف السبعينات بكام ؟
أنا طبعا مش فاكره بس نقول أنها كانت بخمسه جنيه وياريت لو حد فاكر يقولي . المهم 200 جنيه كانوا يجيبوا 40 كيلو لحمه . طيب نفس الموظف ده النهارده بعد ما أترقي وبقي مدير بياخد له يجيي 600 جنيه طيب 40 كيلو لحمه بقي النهارده بكام ؟ 40 * 40 = 1600 جنيه .
يعني مرتبة زاد لكن الحقيقة إن الدخل نفسه قل جدا لدرجه إن المرتب التعبان زمان كان ممكن يعيش أسره لكن المرتب التعبان النهارده مش ممكن يعيش واحد يعني م الأخر كده معظمنا ميتين بالحياة . صح ؟
طيب وإيه تاني ؟
إننا نعيش من غير ما نقدر نعبر عن مشاعرنا سواء الغضب أو الإحباط أو الحزن أو أي حاجه خوفا من الذهاب إلي حيث ذهبت إسراء أي وراء الشمس .
طيب وإيه فايده الحياة إذا كنا حانعيشها مش قادرين نقول إننا زعلانين أو محبطين أو حاجه مضايقانا ؟ يبقي برضه كده نكون ميتين بالحياة . صح ؟
إيه تاني ؟
إننا نعيش مش ضامنين القرش اللي مش مكفينا النهارده ده حايكون موجود بكره ولا لاء ؟
إننا نخاف نعمل أي حاجه غلط ماتعجبش الكبار أحسن مش بس يحاكمونا محاكمه عسكريه لا وكمان يتحفظوا علي أموالنا – إذا كان عندنا أموال –
مافيش عندنا أي حرية للترشيح أو لانتخاب أي حد إحنا عايزينه فعلا
بنتفرج علي مسلسلات مملة وبتحكي عن ناس مش من بلدنا أصلا ومش عايشين فيها لان بلدنا كلها عشش وبيوت فقيرة مش فيلات وقصور وصفقات بالملايين وأثاث يعقد . صح ؟
انك تحب واحده وعشان مافيش معاك فلوس ومن تاسع المستحيلات انك تلاقي شقه وبعدين تفرشها وبعدين تجيب شبكه وفرح ونيله… تروح هي تتجوز واحد تاني بصرف النظر عن هو جايب فلوسه منين . أو تقايس وتتجوزك وتساعدك هي وأهلها وتعيش أنت وهي سنين تسددوا ف أقساط العفش وديون الجواز .
إننا نمرض بأي مرض ومانلاقيش مستشفي محترمه نتعالج فيها ولا علاج فيه ماده فعاله فعلا مش مجرد شويه خلطه من غير دوا بجد فيها .
أقول كمان ولا كفاية نكد ؟ .. افتكروا إحنا من الأول بنتكلم عن إيه ؟
باختصار …. العيشة اللي إحنا عايشينها كلها مش نافعة وإحنا كلنا نعتبر عايشين علي هامش الحياة يعني لو متنا بجد بجد – راجع بداية الموضوع – مش حانبقي زعلانين علي حياتنا اللي خلصت لأننا أصلا كنا ميتين بالحياة
معلش بقي موضوع مأساوي شويه

ياريت تخدوا الموضوع بجد وتستفيدوا وينال اعجابكوا

شوية ايه؟؟؟؟؟؟
دا مأساوي جداااااااااا
بس علي فكرة جميييييييل اوي الموضوع دا
و واقع معظم الناس بتعيشه

ميرسى على مرورك ياسوسو